(SM-Kismaayo)  Xarakada Al-shabaab ayaa ciidammo soo dhamaystay tababar ku soo bandhigtay deegaanka Ambareesa ee gobolka Shabeellada, hoose waxaana ciidamadaas oo dhoola-tus dhigay ay wateen gaadiidka dagaalka iyo hub kala duwan.

Guddoomiyaha Al-shabaab ee gobolka Shabeellada Hoose, Sheekh Maxamed Abuu-Cabdalla oo la hadlay ciidamadan ayaa sheegay in laga doonayo inay ka qayb-qaataan dagaallada ay kula jiraan ciidamada dowladda Soomaaliya iyo kuwa AMISOM ee is-garabsanaya.

“Waxaan rajaynayanaa in maalmaha soo socda aad wacdaro ka dhigtaan goobaha dagaalka oo aad cadawga Alle xanuun gaadhaan. Waxaa la idinka doonayaa inaad dhufaysyada ugu dadadataan cadowga, haddii aad xanuun dareemaysaan iyaguna mid ka daran taas ayay dareemayaan,” ayuu yidhi Sheekh Abuu-Cabdalla.

Dhinaca kale, waxaa ciidamadan la hadlay saraakiil ay ka mid yihiin, Sheekh Cabdallaahi Raabi iyo Sheekh Jaamac Cabdisalaam, waxaanay labaduba ciidanka la soo bandhigay ku boorriyeen inay ogaadaan inay yihiin kuwa kaalin weyn ku leh difaacidda diinta Islaamka.

Ugu dambeyn, saraakiishan ayaa waxay ciidamadan ku guubaabiyeen inay noqdaan kuwo is-walaashada maadaama ay ku jiraan dagaal ay kaga horjeedaan waxay ugu yeerdheen cadow doonaya in dalka iyo diinta uu burburiyo, iyaguna isku arkaan inay yihiin kuwii diinta iyo dal samata-bixin lahaa.

Ma jirin Al-shabaab deegaanno ay qabsatay tan iyo dhammaadkii  sannadkii 2011, balse waxay ka baxayeen deegaanno ay awood badan ku lahaayeen, kaddib markii ay halkaas ku weerareen ciidammo ka tirsan kuwa dowladda Soomaaliya oo kaashanaya kuwa AMISOM.

Salaanmedia.com./Hargeysa