Salaan Media - Warbaahin Dhex-dhexaad ah

Wasiirka Warfaafinta Somaliland Xogogaal Uma Aha Wacyiga Warbaahinta…Dec 28.18

Wasiirka warfaafinta iyo wacyigelintu waxa muuqata in aanu xogogaal u ahayn warbaahinta madaxabannaan iyo waayaheeda. Waayo ma aanu barbardhigeen wadhato suuqa wax ku iibisa oo kharashka joogtada ah ee ka baxaa ka yar yahay kharashka ka baxa TV marka la eego waxsoosaarka labada meheradood iyo kharashyada baxa. TV-yadu waxa ay bixiyaan lacago badan oo joogto ah oo mararka qaarkood xilliyada qaar kabitaan u baahda sida:

Airtime qaali ah (satellite)
Kiro guri oo aan sahlanayn
Laydh, biyo iyo internet
Lacag shaqaale oo ah (mushahaaro ama khidmad)
Qalab si joogta ah dayactir ugu baahan
Shiidaal iyo stationary joogto ah iwm
Sidaas oo ay tahay ilaha kharashku ka soo galaa ma badna.

Xayaysiis aan badnayn, la iskuna hallayn karin
Wararka oo qaar lacag yar laga qaado
Barnaaminyo aan badnayn oo maalgelin hela iwm.
Marka aan kaashado waayo-aragnimadayda muddo aan ka soo shaqeeyey TV madaxbannaan, sida ay isku bixiyaan waa “feedh iyo harraati”.

Waxa kale oo jirta in dhaqaalaha waddanku hoos u dhac weyn sameeyey muddooyinkii dambe, sicir-bararkiina uu halkiisii yahay.

Taasi waxa ay keentay kalsooni-darro soo foodsaartay dhaqdhaqaaqii suuqa iyo wareeggii lacagta markii dadkii wax iibsanayey yaraadeen.

Marka ay sidaas tahay, waa hubaal in aanay TV-yadu qaadi karin cashuuro xaf-dhaaf ah oo lagu soo rogo. Ma lihi yaan cashuur laga qaadin, hase yeeshee waa in cashuurta laga qaadayaa aanay ku keenin culays geyeysiiya in TV badani xidhmaan.

Warbaahinta madaxabannaani uma baahna ka takhalus dadban, wax se ay u baahan tahay xeerar dhiqi kara iyo tayayn waxsoosaar.

Maxamed Baashe Xaaji Xasan

Please follow and like us: