Baarlamaanka dalka Kuwait oo fadhi deg deg ah maanta yeeshay ayaa meel mariyay Amiirka cusub ee dalkaasi yeelanayo, maalin kadib geeridii ku timid Amiirkii Kuwait Sheekh Sabaax Al Axmed Al Jaabir.
Amiirka cusub ee dalka Kuwait ayaa loo dhaariyay Sheekh Nawaaf Al Axmad Al Jaabir oo ahaa dhax suge sidoo kale ahaa walaalka la dhashay Amiirkii dalka Kuwait ee shalay la xaqiijiyay geeridiisa.
Sheekh Nawaaf Al Axmad Al Jaabir oo Baarlamaanka hadal kahor jeediyay ayaa uga tacsiyadeeyay shacabka Kuwait geeridii kutimid Amiir Sabaax, waxa uuna balan qaaday in shaqadii uu hayay Amiirka uu halkiisa kasii wadi doono.
Amiirka cusub ee dalka Kuwait oo ah 83-sano jir ayaa horey xilal kala duwan ay kamid ahaayeen Wasiirada Arimaha Guddaha, Gaashaandhiga iyo Shaqada iyo arimaha bulshada usoo qabtay, waxa uuna kamid ahaa dadka ugu awooda badan Boqortooyada Kuwait.
