Waxa ka socda Gobollada Bari ee Somaliland kacdoon bulsho “ Civil society movement “ kuna waajahan sidii horumar loo gaadhsiin lahaa Gobollada Bariga oo dayacan kuna habsadeen aafooyinka dabeeciga ahi. Waxaynu dhawaan daawanay tartan ciyaareed “ Sports event “ oo ka socda Maroodijeex ayadoo kumanaan qof duleedka Burco u jiifaan darxumo iyo xanuun .Waxa haboonayd in la joojiyo dibiro-dhacsiga ciyaaraha ee ka socda Galbeedka laguna dhawaaqo xaalad deg-deg ah. Hadaba laga bilaabo March, 2017, waxa qurbaha ka bilaabmay dareen shacbi oo diidan kala qoqobka bulshada walaalaha ah ee dhiig iyo dhiicaanba wadaaga kuna aroora “ Ahlul-Bait”. Waxa si dhab ah loo dareemay in dib-udhaca ku habsaday Gobollada Bariga ka dhashay kala qoqob , iskaashi-la’an iyo kala shaki lagu dhex tuuray beelaha walaalaha ah . Waxa lays tusay in Goboladda Barigu yaheen xudunta dhaqaalaha Somaliland “ Economic hub” . Gobolka Togdheer waa saylada ganacsiga xoolaha ee ugu wayn Geeska Afrika. Saraar & Daadmadheedh waxa ceegaaga shidaal & Gaas ; Gobolka Sanaag waxa u gaara Beeyada ; khayraadka badda ee xeebta ugu dheer Somaliland ; Dalxiiska Buuraha Daallo ; Macdanta ku dheehan silsilada Golis sida Emerald, Sapphire, Ruby, Aquamarine, Opal , iron ore, Titanium, Aluminium, Tungsten, Tin, Gale iyo qaar kaloo badan . Bulshadu waxay isku waafaqaday in gacamaha lays qabsado oo laga baxo mugdiga iyo humaaga loona baxo inftiinka iyo nuurka . Dhaq-dhaqaaqa bulshada ee ka bilaabmay Europe wuxuu ka hilaacay lixda gobol ee Sanaag, Saraar, Saaxil, Sool, Togdheer & Zone 5 , Ethiopia”. Waxaanu si mug iyo miisaan leh u taageeraynaa Guddida lagu doortay Burco tkh 2nd June, 2017 oo hogaamin doonta bulshada rayidka ah ee deggan Gobolka Togdheer.
Guddida Midnimo HH , London. UK.