Saraakiisha ciidamada milateriga Kenya ayaa sheegay iney la baxayaan cutub ka mid ah ciidamada ka jooga Somalia ee qeybta ka ah howlgalka.Midowga Afrika ee loogu magac daray AMISOM.
Afhayeenka milateriga Kenya, Cyrus Oguna oo saxaafada kula hadlayey magaalada Nairobi ayaa sheegay in cutubkaas ka tirsan ciidankooda lagu bedelayo cutub ka socda ciidamada dowlada Sierre-leone oo lagu wado in maalmaha soo socda ay gaaraan magaalada Kismaay “Arintan waxaa dhigayey heshiis is-afgarad ah oo aanu horey ula gaarnay golaha amaanka Midowga Afrika kaasoo sheegaya in marka Somalia la geeyo ku dhowaad 1,000 askari oo ka socda Sierre-leone, ay Kenya la baxdo tiro intaas u dhiganta oo ka mid ah ciidankeeda” ayuu intaa ku daray Afhayeenka milateriga Kenya.
Sierre-leone oo noqoneysa dowladdii 6aad ee ciidamo ku xoojisa howlgalka AMISOM ayaa waxaa la sheegay in ciidankeeda ay la howlgeli doonaan ciidamada Kenya ee jooga magaalada Kismaayo.Cyrus Oguna ayaa dhinaca kale beeniyey eedeeymo loo jeedinayo ciidamada Kenya ee sheegaya iney faraha kula jiraan arrimaha maamul u sameynta Jubooyinka, isagoo xusay in ciidamada Kenya ay halkaas u joogaan ilaalinta amaanka, arrimaha maamul u sameynta Jubooyinkana ay taalo dowlada Somalia iyo dadka degaanka.