Madaxweyne Ku-xigeenka Somaliland Oo Dalka Ku Soo Laabtay, Kana Warramay Natiijada Socdaalkiisa
Madaxweyne Ku-xigeenka Md. Cabdiraxmaan-Saylici oo ka soo degay garoonka diyaaradaha ee magaalada Berbera, waxa soo dhaweeyay Wasiirka Madaxtooyadda Xirsi Cali Xaaji Xasan, Wasiirka Kalluumaysiga iyo Khayraadka Badda Cabdillaahi Jaamac Cismaan (Geel-jire), Guddoomiye Ku-xigeenka gobolka Awdal, Maayar Ku-xigeenka Boorama iyo Maamulka gobolka Saaxil iyo degmada Berbera.
Sidoo kale, waxa Weftiga kaga hor-tagay Tuuladda Aw-Barkhadle Wasiir Ku-xigeenka Wasaaradda Warfaafinta, Dhaqanka iyo Wacyigelinta Cabdillaahi Maxamed Daahir (Cukuse), iyo Guddoomiyaha Ha’yadda Abaabul-ka-saarka Qaranka Jamaal Caydiid Ibraahim.
Madaxweyne ku-xigeenka Somaliland oo qolka nasashada ee madaarka Berbera ugu warramayay saxaafadda ayaa ka warramay ujeedadii socdaalkooda oo qaatay muddo saddex toddobaad ku siman, waxaanu u mahad-celiyay Jaaliyadda Somaliland ee ku dhaqan Ingiriiska. “Muddo saddex toddobaad ah ayaan ka maqnayn dalka, iyadoo Safarkayagu ahaa safar qorshaysan oo Xukuumadda Somaliland ugu talo-gashay in Jaaliyadaha dibedda lagala qeyb-galo Xafladdii 22-guuradda ka soo wareegtay dib ula soo noqoshadii madax-bannaanida Somaliland. Aniguna waxaan hoggaaminayay Wefti kala qeyb-galay Jaaliyadaha Ingiriiska munaasibaddii 18-ka May. Jaaliyadaha Ingiriisku waa jaaliyadaha ugu weyn jaaliyadaheenna dibedda, waxaanan kala qeybgalay dabbaal-deggii 18 May.” Sidaa ayuu yidhi Madaxweyne Ku xigeenka Somaliland Cabdiraxmaan-Saylici.
Madaxweyne Ku-xigeenka Somaliland oo hadalkiisa sii watay waxa uu yidhi; “Runtii si wanaagsan bay noogu dhacday dad midaysan oo meel u wada-jeeda ayaannu u tagnay, Xaflado aad u qurux badan oo London kow ka ahayd, iyo saddex magaalo oo kale ayaannu Xaflado kaga qeybgalay, iyadoo ay jeclaayeen magaalo kastaaba aannu u tagno, waxaanay aad u danaynayeen Madaxda Somaliland. Intii noo suurto-gashay afar magaalo oo waaweyn ayaan kaga qeyb-galnay. Arrintaasi midho weyn ayay dhashay. Waxaan maanta ka nimid dadkii oo midaysan oo meel u wada-jeeda oo himiladii ay hiigsanayeen 22-kaas sannadood iftiinka u socda ay fahamsan yihiin inay wax ku gaadhi karaan iyagoo wada-jir ah.”
Salaanmedia.com
Hargeysa/Somaliland.