(SM-Hargaysa)Xisbiga Mucaaridka ah ee UCID ayaa Canbaareeyay Xadhiga Muwaadin Ismaaciil Maxamed Ciise oo dhawaan Maqaal uu Fikirkiisa ku Cabiraayo kaga hadlay in Xukuumadda Jirtaa aanay haysan Taageeradda Beesha oo uu Wasiirka Warfaafinta Wacyigelinta iyo Dhaqanka Somaliland Md Cabdilaahi Maxamed Daahir (Cukuse) uu hore u sheegay inay Xukuumadda si buuxda u taageersan tahay, iyadoo Muwaadin Ismaaciil uu Maqaalka ku sheegay in aanay Xukuumaddu xidhi karin Hogaanka sare ee ururka Madasha Wada Tashiga Iyo Toosinta la baxay taasina keentay Wasiirka oo Warfaafintu Xidho Ninkaasi Fikirka ha hadlay.
Hadaba Xoghayaha warfaafinta xisbiga cadaalada iyo daryeelka ee UCID Yuusuf Kayse Cabdilaahi ayaa Xukuumadda ku Canbaareeyey xadhig loo gaystay Ismaaciil Maxamed Ciise oo uu sheegay inuu yahay xubin ka tirsan golaha dhexe ee xisbiga UCID. Xoghayaha warfaafinta ee xisbiga UCID oo u waramay Warbaahinta ayaa waxa uu sheegay in xadhiga loo gaystay xubintaas ka tirsan golaha dhexe ee xisbiga Ucid ay timid ka dib markii uu qoray maqaal uu ku cabirayo fikirkiisa oo uu ku sheegay inaanay xukuumadu wax taageero ah ka haysan beesha uu ka soo jeedo wasiirka warfaafinta Somaliland. Xoghayaha warfaafinta xisbiga Ucid Yuusuf Kayse oo ugu horayntiiba ka hadlaya xadhiga loo gaystay xubinta ka tirsan golaha dhexe ee xisbiga Ucid ayaa waxa uu yidhi “Aniga oo ku hadlaya magacayga iyo kan xilka a an ka hayo xisbiga Ucid waxaanu aad iyo aad u canbaaraynaynaa xadhiga xaq darada ah isla markaana cabudhinta ah ee shalay lagu xidhay Ismaaciil Maxamed Ciise kaas oo ka tirsan golaha dhexe ee xisbiga Ucid, xadhigaas oo aanu u aragno xisbig ahaan cabudhin, cadaala darro, keligii talisnimo lagu wiiqayo xoriyatul qawlka dalka jamhuuriyada Somaliland taas oo ka mid ah dibin daabyada lagu hayo shacbiga Somaliland.” Ayuu yidhi xoghayaha warfaafinta xisbiga Ucid. Xoghayaha warfaafinta xisbiga Ucid waxa uu faah faahin ka bixiyey sababta keentay xadhiga xubintan ka tirsan golaha dhexe ee xisbiga Ucid waxaanu yidhi “Xadhiga xubintan ka tirsan golaha dhexe ee xisbiga Ucid waxa keenay ka dib markii uu qoray maqaal uu fikirkiisa ku cabirayo kaas oo uu kaga hadlayey inaan la xidhi karin gudoomiyaha madasha wada tashiga iyo toosinta qaranka mujaahid Xasan Guure iyo gudoomiyaha xisbiga ucid Eng Faysal Cali Waraabe isla markaana aanay xukuumadu taageero ka haysan beesha uu ka soo jeedo wasiirka warfaafinta Somaliland” ayuu yidhi xoghayaha warfaafinta xisbiga Ucid. Sidoo kale xoghayaha warfaafinta xisbiga Ucid waxa uu sheegay inay saldhiga dhexe ee magaalada Hargeysa oo uu ku xidhan yahay Ismaacil Maxamed Ciise ay ku booqdeen isla markaana waxa uu sheegay in hogaanka ciidanka ee saldhiga dhexe u sheegay in amar lagu siiyey inay soo xidhaan xubintan isla markaana ay sii deyn karaan oo kaliya cida soo xidhay.
Salaanmedia/Hargaysa
