” Aniga Iyo Guddoomiye Cirro Waanu Isla Ogayn Isku Shaadhayntan, Balse Bani Aadam Ayeynu Nahay Way Qaldami Karaan”: Guddoomiye Ku-xigeenka 2aad

index

 

SM(Hargaysa)- Guddoomiye ku-xigeenka 2aad ee golaha  wakiilada Somaliland  Cali Maxamed Yuusuf  ayaa ugu mar-marsooday  isku shaadhayn uu shir guddoonka wakiiladu  ku sameeyey  guddi hoosaadyada  golaha  kaasi oo isaga iyo guddoomiye-xigeenka 1aaad  Baashe  Maxamed Faarax ay qoraal kaga soo horjeesteen  isku shaadhayntaasi ka dib todobaadyo ay ogolaayeen.

Labadan  guddoomiye ku xigeen oo maanta qoraal ka soo saaray  xarunta  wakiilada ayaa  Cali  Maxamed Yuusuf  uu sheegay in uu dib uga noqday go’aankaasi uu la ogaa guddoomiyaha golaha Cabdiraxmaan Cirro waxaanu ku dooday in uu yahay qalad ka dhacay “Aniga iyo  Guddoomiye Cirro waanu  isla ogayn  isku shaandhaynta balse  dee bani’aadam ayeynu nahay oo  waynu qaldami karnaa waxaanu arrinkani khilaafsan yahay  xeerhoosaadyada  golaha ” ayuu yidhi Cali Maxamed Yuusuf .

Geesta kale isku shaandhayntan  lagu sameeyey guddi hoosaadyada  golaha ayaa waxay  wiiq-day awoodii uu  xisbiga Kulmiye ku lahaa  golaha wakiilada  iyada oo xisbiga mucaaridka ah ee WADDANI kaga adkaaday laba  guddoomiye hoosaad ee xisbiga  Kulmiye iyo  xukuumaddu u arkeen jagooyin muhiim ah  oo ay golaha dhexdiisa  ku waayeen  waxaana ka mid ah  guddoomiyaha  guddida joogtada ah ee golaha  oo uu ahaa  Xildhibaan  Maxamed Barkhad Miigane oo ka tirsan  xisbiga Kulmiye  halkaasi oo lagu bedelay  Xildhibaan  Ibraahim Mahdi Buubaa oo ka mid ah  xisbiga Waddani iyo jagada guddoomiyaha guddida arrimaha gudaha amniga iyo difaac ee golaha oo uu hore u ahaa  xildhibaan Siciid Cilmi Rooble oo ka tirsan xisbiga talada haye ee Kumiye waxaana lagu bedelay  Ibraahim Jaamac Rayte  oo ka tirsan xisbiga mucaaridka ah ee Waddani.

Waxaana wararka laga helayo madaxtooyadu ay sheegayaan in labada  guddoomiye ku-xigeen   habeenimadii  xalay looga yeedhay madaxtooyada  isla markaana la soo faray in olole u galaan awaamir ay ku daadafaynayaan isku shaandhaynta uu Gudoomiyaha Goluhu  ku sameeyey guddi hoosaad yada golaha .

Iyada oo todobaadkii hore ee  ay 27 xildhibaan oo ka tirsan xisbiga Kulmiye  ay xukuumaddu hadhimo sharafeed ugu samaysay Hargeysa waxaana ilo wareedyadu intaasi ku dareen   kulankaasi lala yeeshay xildhibaanada uu nuxurkiisu ahaa  abaabul mooshin ka dhan ah  guddoomiyaha golaha wakiilada waxaana lagu sheegay in loo adeegsan doono xilka qaadis ay xukuumaddu dabada ka riixayso  qodobo ay ka mid yihiin shirka dood qaran  ee ay xisbiga mucaaridku  iclaamiyeen qabashadiisa.

Salaanmedia/Hargaysa