Xulka Spain Oo Weli Hogaanka U Heysa Qiimeynta Bilaha FIFA Oo Maanta La Soo Saaray
Xulka Spain ayaa weli hogaanka u haya qiimeynta bilaha FIFA iyadoo aysan waxba iska bedelin bishii Febrauary shanta xul ee ugu sareysa.
Germany ayaa weli kaalinta labaad ku jira, Argentina 3aad, Portugal 4aad iyo Colombia oo shanaad ku jirta. Uruguay ayaa hal boos kor u soo kacday iyagoo soo galay kaalinta lixaad.
Switzerland ayaana u dhacday kaalinta 7aad halka Italy iyo Brazil ay ku kala jiraan kaalimaha 8aad iyo 9aad. Xulka Belgium ayaana dhameystiraya 10ka xul ee ugu sareysa iyagoo booskaas kala baxay Holland kuwaasoo u dhacay kaalinta 11aad.
England oo ciyaartii saaxiibtinimo ee dhawaan ka badisay Denmark ayaa seddex boos kor u soo kacday waxaana ay soo galeen kaalinta 12aad. France ayaa iyadana waxa ay ku jirtaa kaalinta 17aad.
Qaarada Afrika waxaa ugu sareysa Ivory Coast kuwaasoo qiimeynta adduunka hal boos hoos ugu soo dhacay waxaana ay ku jiraan kaalinta 24aad. Asia waxaa u sareysa Iiran oo ku jirta kaalinta 42aad.
