Toddoba Arrimood Oo Halgamaagii Reer Hindiya Ee Gandhi Sheegay Inay Burburiyaan Aadamiga
Halgamaagii waynaa ee reer Hindiya Mahatma Gandhi waxa uu ka mid yahay, dadka taariikhda balaadhan kaga tagay dunida, isla markaana lahaa halku dhegyada dhaxal galka noqday, ee hogo tusaalaynta iyo talo bixinta isugu jira, kuwaas oo marka loo eego xigmadooda iyo mabaadii’da ay ku qotomaan gaadhsiisan heer caalami ah oo wakhtiyo kala duwan iyo umado kala gadisan saamaynaya.
Mahatma Gandhi waxa uu ka tagay halku dhegyo tiro badan oo uu kaga hadlayo, halganka, xoriyada, gabood falyada aadamiga loo gaysto, ku dhaqanka sharciga, toosinta maamulka iyo tilmaamida shacabka.
Todobada qodob ee aynu maanta ku soo qaadan doono, qormadeenan waxa uu kaga hadlayaa, waxyaabaha aadamiga noloshooda iyo qiimahooda burburiya, kuwaas oo dhamaantood ka dhasha waxyaabo aadamigu u baahan yahay, balse si khaldan loo adeegsaday, sida dedaalka lagu kaco ee aan qorshaha lahayn, cilmiga aan damiirku wehelin, ganacsiga aan akhlaaqda ka madhan iyo arrimo kale oo dhamaantood ay suura gal tahay in meel kasta oo dunida ka mid ah ay wakhti kasta ka dhici karaan, todobadaa arrimoodna waxa ay kala yihiin sidan.
1. Siyaasad Aan Mabda ku dhisnayn. Haddii aynu in yar is dul taagno waxa aynu dhamaanteen ka wada dheregsanahay in siyaasad kasta oo dunida laga hir galinayaa ku salaysan tahay, mabda si ay midho dhal u noqoto, laakiin marka ay bilaa mabda’a tahay waa duulaan aan cid ku jihaysnayn oo lagu kaco oo kale.
2. Hanti Aan Loo Dhididin. Sida dhamaan aadamigu ka siman yahay, wax kasta oo qofka ku soo gala, si fudud, wuxuu u dhaafaa si fudud, hanti aanu qofku shaqaysan ama u dhididina waa la wada yaqaana sida ay nolosha aadamiga u baabiiso una burburiso.
3. Garasho Aan Qiimayni la socon. Garashada aan qiimaynta xaaladaha dhabbta ah ee kugu xeeran iyo kuwa kaa hor iman kara aan lagu qiimayn, isla markaana sida aad u garanayso uun ku doonayso inay kugu meel marto, waa la wada garan karaa cawaaqibka ka dhalan kara.
4. Ganacsi Aan Akhlaaq ku dhisnayn. Marka ganacsigu noqdo mid bilaa akhlaaq ama dhaqan aan ku salaysnayn, isla markaana dad nimadu ka reeban tahay, waxa uu noqdaa mid aadamiga burburiya.
5. Aqoon Aadaminimada Ka Madhan. Bal akhriste is waydii, haddii qof aqoon u leh dhakhtarnimada oo ah mid dhamaanteed aadaminimo ku dhisan, uu noqdo qof ka madhan iinsaaniyada, muxuu samayn karaa, sow ma noqonayso in halkii uu bukaankiisa uga gargaari lahaa uu ka dhibaateeyo ama ganacsiba u arko, aqoontiisi ku salaysnayd gargaarista aadamiga?
6. Raaxaysi bilaa damiir ah. Marka qofku damco inuu dunida ku raaxaysto waxa kaliya ee xidhi karaa, waa damiirkiisa, laakiin hadduu ka gudbo waynu wada garan karaynaa in wax kasta oo xun uu u arki karo ama ay ula muuqanayaan mid uu raaxada ku gaadhi karo, ilaa heer dunida lagu arkay dad inta ay xitaa daroogadii maan dooriyayaasha ahayd ee la isla yaqaanay dhaafeen, isku dayay inay samaystaan wax ka wada sareeya ilaa ay ku waayeen naftoodi ama laxaadkoodi.
7. Ciibaado aan Tadxiyo lahayn. Cibaadadu sida aynu dhamaanteen isla wada garan karno, waa dedaal Alle loogu dhawaado, kaas oo lagama maarmaan ay tahay, inaad hal adayg u lahaato oo carqaladaha kaa hor iman kara aad ugu dhabar adaygto, tusaale ahaan haddad tahay qof muslim ah oo aad gaal u shaqayso, maaha caqli gal inaad cibaaddada Rabi uga baaqato ama ay kaa maanacdo.
