XAARAAN CUNISTA MADAXDA IYO XANNUUNKA XILKA QAADISTA KA DIB

.FB_IMG_1535061386719

Masuuliyiinta xilka ummadda u haysa qaarkood markay xilka qabtaan waxay markaba bilaabaan inay laba liqaan xoolaha ummadda oo qaab xaaraan ah u isticmaalaan. Masuulkii xilka hayey hantidii ummadda ayuu ku tagri falayaa intuu xilka hayey, markaasuu keyd ka dhigtaa oo ku shubtaa xisaabaad uu gaar u leeyahay (personal account).

Xanuunka Xilka Qaadista ka dib

Tuaaal ahaan masuulka ayaa keyd ahaan u dhigtay lacag qadarkeedu yahay $600,000. Lix Boqol oo kun oo Dolar Isagoo ku faraxsan lacagta badan ee uu helay ayaa xilkii laga qaadayaa, ka dib wuxuu is oranayaa imika ayaad fursad u heshay inaad lacagtii waxa ku qabsato. Ha noqoto inuu guryo ku dhisto amma ganacsi ku furto. Markaa xilka laga qaado ayuu xanuun xaga ilaahay ka yimid ku dhacaa. Markaba waxa la dhigaa dhakhtar gaar loo leeyahay oo lacag badani ku baxayso.

In muddo ah ayuu ku jiraa. Hadana waxa la oranayaa halkan waxba waa lagaga qaban waayey ee dibada ha loo qaado. Tikidhkii, baasaaboorki iyo diyaaradii ayey lacag badani ku baxaysaa. Waxa loo qaaday dalka Hindiya dhakhtarkii la gee, muddo ka dib hadana waxa la yiri halkan waxa ka dhakhtar fiican dalka Maleysiya ha loo qaado, Maleysiya la gee muddo ayaa halkaasi lagu daweeyaa, hadana waxa la yiri dhakhtarka ugu fiicani ee xanuunka dawayn lahaa waxa laga helayaa Jarmalka. Jarmalkii la gee muddo halkaasi lagu dawee.

Masuulkii ilaahay xaaraan kaga jarayo ifka ee ajali u dambayso wuxuu soo noqdaa isagoo caato ah oo aan shilin ka hayn lacagtii $600,000,Lix Boqol oo kun oo Dolar aheyd ee xoolaha ummadda laheyd. Ka kalena intuu xanuunsado ayuu ku dhintaa, aakhirana ilaahay ayaa la xisaabtama. Madaxda qaarkood iyagoo xilka haya ayey toos guryo ugu dhistaan xoolaha ummadda, markay xilka laga qaado ayey xanuusadaan guryihii xaaraanta ahaa ayaa dib loogu xarashaa si loogu daweeyo.

Cunista iyo ciqaabta ka dhalanaysa xoolaha ummadda
Ilaahay SWT wuu xaaraantimeeyey cunista xoolaha agoonta, siday sheegayso aayadda 10-naad ee suuradda Al-Nisaa “kuwa xoolaha agoonta ku cunaya dulmi, waxay calooshada gelinayaan naar”. Qofka madaxda ahi waxa uu ka baxay ballankii uu ilaahay la galay, marka uu xoolaha ummadda cunaayo. Sidoo kale wuxuu ilaahay SWT suuradda Isra aayadda 34 wuxuu ku sheegay kuna amray dadka muslimiinta ah” Oofiya ballanka, waayo qiyaamaha ballanku waa mid lays weydiinaayo”. Ma jirto khiyaamo ka weyn in xoolaha ummadda la xado oo la cuno. Xadiis saxeexa ah ayuu Nabigu (NNKHA) ku yidhi” Qofka na khiyaamaa naga mid maaha”. Waxa soo saaray Muslim, waxaana weriyey Abu-Hurayra.

Suuradda Aali Cimraan aayadda 161-naad ayuu ilaahay SWT ku yiri” Qofka wax xada amma khiyaameeya, qiyaamaha waxa uu la iman waxa uu xaday amma khiyaameeyey.” Dhammaan aayadahaasi iyo axaadiistaasi wax ay inoo caddaynayaan inay xaaraan tahay in xoolaha ummadda xaq daro lagu cuno. Ilaahay xaqa ha ina waafaqiyo.

Fadlan Walaal adigoo Mahadsan Share dheh oo la wadaag walaalaha kale si ay u aqriyaan qoraalkan.

Qalinkii: Cali Cabdi Coomay.