Aug 9,2013 Muqdisho(SM) Madaxweynaha dowladda federaalka Soomaaliya Mudane Xasan SH Maxamuud ayaa ku dhawaaqay in dowladda Soomaaliya ay qabanqaabinayso shir weyne ay ummadda Soomaaliyeed kaga arinsan doonaan aayaha dalka Soomaaliya,Madaxweynaha ayaa sheegay iney muhim tahay in shacabka Soomaaliyeed ay ka tashadaan masiirkooda.
“Deganaansho dhaqaale,mid amni iyo mid Siyaasadeedba waxaan gaari karnaa marka aan isku imaano oo aan ka wada tashano aayaheena,markaan isa soo hor fariisano ayaan talada heleynaa,hadii aan kala jeedno tala hagaagsan heli mayno”ayuu yiri Madaxweyne Xasan SH Maxamuud.
Madaxweynaha ayaa shaaciyey in dowlada uu hogaaminayo ay ka go’an tahay isku keenka ummadda Soomaaliyeed,wuxuuna sheegay iney dowladu dadaal ugu jirto sidii ay sidii shacabka Soomaaliyeed meel la iskugu keeni lahaa kadibne ay uga arinsan lahaayeen aayaha dalka,wuxuuna ku booriyey in shirkaas laga soo saaro natiijo wax ku ool ah oo dacalada laga hayo sida uu sheegay.
Xasan SH Maxamuud Madaxweynaha dalka ayaa tilmaamay in dowladdu ay qabanayso shirweyne ay ku casuumayso dhammaan shacabka Soomaaliyeed iyo maamulada dalka ka jira,wuxuuna ugu baaqay dadka gudaha iyo kuwa ku nool dibadaha iney kasoo qaybgalaan gogosha ay fidisay dowladdu isla markaane aysan aysan bakhiilin ra’yigooda Muruq,Maskax iyo Maalne ay ku garab istaagaan dalkooda iyo dowladooda.
Wuxuuna ku celceliyey in sida kaliya ee ay Soomaalidu kusoo ceshan karto Karaamadii iyo sharaftoodii ay tahay qaranimo,si loo gaaro qaranimo buuxdane ay muhim tahay in ummadu ay noqoto dad hal meel wax u wada oo isku aragti ah.
Madaxweynaha ayaa carrabka ku adkeeyey in dowladda federaalka Soomaaliya aysan cid gaara duulaan ku ahayn,aysane jirin cid ay wanaageeda kasoo horjeedo balse ay wanaag iyo guul la wada dooneyso dhammaan ummadda Soomaaliyeed meelwalba oo ay joogto.
Salaanmedia/Mogdisho
