Mar kale iyo Golihii Sacabka!
Waqtigii ay aheyd sharciyan in shir beeleedka Kulmiye ku qabsoomo
ayaan suurta galin khilaaf xoogan oo u dhaxeeyey hor boodayaasha ugu tunka
waaweyn taasi oo sababtey in dib loo dhigo ugu yaraan saddex ilaa afar jeer. Dib
u dhacyadaa faraha badani , ma aheyn xag farsamo ama dhaqaale;balse waxa
sal u ahaa, loolan siyaasadeed oo ka dhex taagnaa hogaanka sare.Wuxu dhawr
jeer Xisbigu qarka u gaadhey kala burbur. Kala qeybsanaanta hogaanka Kulmiye
wali waa halkeedii. Lama dhihi karo uu ka badbaadey burbur mar haddii shirkii
qabsoomey oo waxa la gaadhey xal kama dambeys ah. Halka sartu ka qudhuntey
iyo buugtiiba lama dhayin. Kalsooni la iskuma qabo; midiyihiisa ayuu mid kastaba
hoosta ku heystaa. Waxa kaliya ee ay ku heshiiyeen in aanu shirku mar kale dib
loo riixin oo dadka la tuso in uu qabsoomey. In Xisbiyada qaranku shirweyne
qabtaan waa sharci ujeedooyinka laga leeyahayna waxa ka mid ah:
1. In laga gudbo dawladnimo hab beeleed ku dhisan si aan adduunkana uga
helo tixgalin inoo horseedi karta ictiraaf caalami ah.
2. In xisbiyadu aaney noqon kuwo qof,koox ama beeli ku amar kutaagleyso oo
ninka la doono laga eryo isaga oo aan dambi galin ama an jabin sharciyada
xisbiga, sidii ku dhacdey Cabdiraxmaan Cabdulqaadir.
3. In si dimuqraadi ah ergooyinka shir weynuhu u doortaan hogaanka sare ee
xisbiga, Golaha fulint iyo Golaha dhexe inta u dhexeysa labada shir weyne.
4. Waxey aheyd, in shir weynaha lagu soo doorto Musharaxa madaxweyne/
M.xigeenka ee xisbiga uga qayb galaya taratanka madaxtinimada ay
axsaabta qaranku ku loolami doonaan.Qof kasta oo hunguri ka hayo
hogaaminta dalka u helo fursad ugu tartamo si xor ah xisbiga dhexdiisa oo
qofka ka guuleysta codka ergadu noqdo musharaxa madaxweyne/M xigeen
ee xibigiisa.
5. In sida dimuqraadiyadu tahey kuraasta hogaanka xisbiga ee gudoomiyaha,
k/xigeenada, fulinta,Golaha dhexe, Musharaxa madaxweyne iyo ku
xigeenkiisaba lagu tartamo oo lagu kala guuleysto codka ergooyinka shirka.
6. In xulitaanka Ergooyinka shirku waafaqsan tahey xeerka xisbiga. Hogaanka
sare iyo wakiilada xisbiga ee gobolada iyo degmooyinku soo xulaan.
Nasiib daro, waxa oo dhamba inta la iska laabey ayaa lagu noqdey
habkii Xisbigii Hantiwadaaga kacaankii Soomaliya ee aheyd in
inta liisaska guriga lagu qoro Golaha laga hor akhriyo sacabka u tumaan
doorasho lagu sheegi jirey.Hanti aad u badna sacab tunkaa ku baxeysey.
Shirkan Kulmiye, Miyaanu laba kacleyntii ama dib u soo if baxii X.H.K.S
u xuubsiiban? Sidoo kale, Liisaskii waa la soo diyaariyey, dadka tiro ahaan 1200
ah, magacyada laga hor akhriyey sacabka looma tumin.
Xubnihii damaca siyaasadeed lahaa, miyaan xaqoogii la duudsin lama
tartami kartaan dadka loo gartey, laguna qasbin in ay candhuufta dib u
liqaan.
Kharashka labadaa maalmood iyo sacab tunkaa ku baxey waa $1,000,000
waxa intaa sii dheer oo wax lala yaaba ah; Maxey keeney in qurba-jooga
fasaxa u yimid inta lagu soo casuumo u dabaaldega shirka loo qeybiyo
$500.00 aaney baahi u qabin! iyada oo dalka xaalad abaaro iyo roob la’aan
ka jirto, dadku gaajo iyo haraad u dhimanayaan. Qaar ka mid ah qurba
jooga waxa lacagtii u qeybiyeen masaakiinta suuqyada ka tuugsada.
Dabaaldega 18ka May ayaa wafuud look ala dirayaa dalal badan oo dibada
ah si ugula qeyb galaan xafladahaasi kharashka ku baxayaa dadka iyo
xoolaha ooman dhawr ceel u qodi laheyd. Jaaliyada Shafield hawshii ay
iskood u qabteen ayaa lacag aaney ka dalban wasiir jeebka loogu shubey
taasi oo markii ay sheegtey Haatuf dambi looga dhigey oo xuquuqdii looga
qaadey.
Hantida ummada ee sida xun loogu takri falayaa halkeebey ka timi,
miyeyna aheyn in baahiyaha dadka ee faraha badan wax lagaga qabto.
“ NINKA WAAN DUCEYSAN YIDHIYEE,UGU YEEDHEY KII HEYSTEY QADADEE, AN
U YEEDHIN, DARBI JIIFKA LA TIICAAYA BAAHIDA; DUCADIISU WAA BEEN.”
DAN YARE DAYACAN OO DIB U EEGTEY WAAYAHAA TIDHI:
Haddii aan ogahey In Dawladnimo Waartaba dan laga laheyn.
Haddii aan ogahey In aan damiirkiinu darajiyo doolar dhaafsaneyn.
Haddii aan ogahey I damaciinu daneysi gaara uu ahaa.
Haddii aan ogahey In dan ummadeed loo dagaalameyn.
Haddii aan ogahey In dastuurka iyo Diintaba xeerineyn.
Haddii aan ogahey In da’yarta iyo dumarkuba darxumoonayaan.
Haddii an ogahey In dulmi mooyee cadaaladiba jireyn.
Haddii aan ogahey In dawan iyo durbaan been ah noo tunteen.
Ma waayeen, diricyadii halgamey iyo agoonteyda Aabahood.
Ma waayeen,Duunyadaan hureen dawladnimo ku gaadh lahaa.
Ma waayeen waxaan xoolo iyo daar laheyn.
Ma waayeen dahab iyo wixii maal ii keydsanaa.
Eebaa caadiloo u gargaarin daalimkoo, isagaan magantiisa nahey.
Allaa Mahad Leh. Abdi Geireh.