Goldaloolada Maanta, Ma Gufayn Kari wayday, Waa Geeraar aad u Qiimo Badan, oo ku Wajahan Golaha Guurtida, Talooyin Qaranna Xambaarsan..By Cabdiwelli Yalas.
Waxaan halkan ka salaamayaa dhamaan bahda saxaafada xorta ah iyo shacabka qiimaha leh ee reer soomaaliland ee asalaama calaykum waramatulaahi waabarakaatu. bacada salaan ku soo dhawaada Goldaloolada Maanta.
Anigoon gefahaynin
Cidna gaasira haynin
Geeraarkan dhegaysta
Waxgarad baynu lahayn
Dad-ku soo guray oo
Dalka gees ilaa gees
Gaaf wareegi jiroo
Gacaltooyo leh oo
Dhex u soo gurmadoo
Goob dagaal ka dhacaayo
Dhiigu uu gobo leeyey
Inta ay dhex galaan
Go cad uun u luloo
Gogol weyn dhiga oo
Guul weyn dhaliyoo
Soo gunaanada hawle
Hada saw may giriifin.
Hadii uu nin gaboobay
Ku gabood falo dhaartoo
Garta eexo u qaado
Gadhwadeen ma noqdoo
Xaajo kuuma galee
Guurtideeni bal eega
Sida ay u gamaartaye
Golihii u daciifaye
Xilkoodii ay u gabeene.
Saleebaan galaaftaye
Runtaan soo gudbinaayiyo
Geeraar kan dhegaystoo
Gurigan aynu ku noolay
Geesiyaal buu lahaa
Xaqa gees marinoo
Laaluush aan gayinoo
Hadii waaxyo la gooyo
Ama gawrac la saaro
Garashadooda tashoo
Godob aan gelin oo
Gardaroonin waqoode
Tani waaba gariire
Lixdan guuriyo iyo ahaatan
Inta geesi shahiiday
Cadaalad bay u go’een oo
Godka ay u galeen oo
Baadi goob loo ahaaye
Goldaloolada maanta
Ma gufayn kari wayday
Guule ha ina gargaaree
Murtidan aan gudbinaayiyo
Geeraar kan dhegaysta
Gadabiirsiga awdal iyo
Ciisahaa la gudboon iyo
Dhulbantahaa gurxamaayiyo,
Warsan gelow soo dhawaada
Gacmahiina i siiyoo
Gacal kayoow i dhegaysta
Dunidu waa kala guuroo
Geeskan aynu ku noolay
Geeddaa lagu yoo
Hadaynaan u guntan
Garaad keena midayn
Gaalaa qabsan doonte
Gacma ma is qasanaa?
Ceeri gaabo iyo ceelka=ceel afweyn
Gar adag Oog iyo Cayn
Goonyaheeda Togdheer
Oodweyne Garbaa
Guban buur iyo Saaxil
Gacanlibaax iyo Hawd
Salaxlay ciida galoodhan
Gabiilay oo cudud weyn le
Gacmaha aan is qabsanee
Gacalkayoow soo dhawaadoo
Waabilaahi tawfiiq
By CabdiwelliCabdihaali Yalas.