Qarax loo adeegsaday gaari waxyaabaha qarxa laga soo buuxiyay, ayaa goor dhaw ka dhacay nawaaxiga Wasaaradda amniga ee ku taallo Degmada Shangani.
Jugta qaraxan ayaa si aad ah loo maqlay, waxaana wararka ay sheegayaan in qaraxa uu ka dhacay meel aanan ka fogeyn dhismaha Wasaaradda amniga.
Lama oga Khasaaraha ka dhashay qaraxan ka dhacay nawaaxiga Wasaarada amniga ee ku taalo Degmada Shangaani ee Gobolka Banaadir.
Wasiirka Warfaafinta Somaliya C/raxmaan Cismaan Yariisow, ayaa Bogiisa xiriirka Bulshada wuxuu ku sheegay in qaraxa uu ka dhacay maqaayad ku taalo ka soo horjeeda Wasaaradda dhalinyarada oo aanan sidaasi oga fogeyn dhismaha Wasaaradda amniga.
“Maqaaxi laga cunteeyo oo ku taala kasoo horjeedka Wasaarada Dhalinyarada iyo Cayaaraha ayaa Waxaa ka dhacay qarax xoogan oo loo adeegsaday Gaari.”
Qaraxan ayaa ku soo aadaya, iyadoo Wasiirka cusub ee Wasaaradda amniga shalay uu shaaciyay in isbedel cusub oo dhanka ammaanka ah laga dareemi doono Magaalada Muqdisho.
Qaraxyada iyo dilalka qorsheysan ayaa ku sii kordhaya Magaalada Muqdisho oo dowladda Somaliya ay gacanta ku hayso.
